У Пухавіцкім РЭС Святлана Лобань працуе адзінаццаць гадоў. Спачатку пяць гадоў адпрацавала электраманцёрам па аператыўным абслугоўванні на Рудзенскім вытворчым участку, затым прыйшла ў раённую дыспетчарскую службу РЭС. Апошні год працуе на пасадзе старшага дыспетчара.

— Пасля заканчэння ўніверсітэта я вярнулася ў Мар'інагорскі аграрна-тэхнічны каледж выкладчыкам электратэхнічных дысцыплін — распавядае Святлана. — Але практычная праца ў РЭС мне падабаецца больш. Мне вельмі пашанцавала з калегамі. Яны добразычлівыя, уважлівыя, сапраўдныя прафесіяналы.

Суразмоўца пагаджаецца з тым, што яе прафесія больш мужчынская. Многія памылкова думаюць, што праца дыспетчара абмяжоўваецца прыёмам званкоў і заявак ад спажыўцоў. На дыспетчара кладзецца вялікая адказнасць, бо ўсе працы аварыйныя брыгады могуць вырабляць толькі з яго дазволу. Дыспетчар каардынуе месца і час працы ўсіх брыгад, каб яны не патрапілі пад напружанне, і з месца кіруе ліквідацыяй аварыі.

— Таму мы штогод здаём экзамены. Усе разумеем, наколькі важныя веды ў нашай справе. Вядома, дыспетчар павінен валодаць хуткім мысленнем, кемлівасцю, - адзначае Святлана Лобань.

Дыспетчарская служба працуе кругласутачна. Па зменах тут працуюць пяць дыспетчараў. Мікалай Валкевіч у прафесіі ўжо больш за 30 гадоў, мае званне ветэрана працы мінскіх электрычных сетак. Шмат гадоў працуюць Аляксандр Iшков, Дзмітрый Шклярык, Яўген Балакіраў. Аляксандр Хацкевіч толькі ў канцы мінулага года папоўніў калектыў дыспетчараў, але калегі ўжо кажуць аб ім як аб разумным і здольным спецыялісце. Узначальвае дыспетчарскую службу Сяргей Харытончык.

Разам з дыспетчарам на дзяжурства выходзіць і аператыўна-выязная брыгада. У Пухавіцкім РЭС працуюць вопытныя электраманцёры, якія разумеюць калег з паўслова.

— Мне пашчасціла працаваць з электраманцёрамі Анатолем Плышэўскім, Анатолем Багдановічам, кіроўцам Пятром Няпеўным, - працягвае Святлана. - Тут жа я сустрэла шмат добрых людзей, якія сталі настаўнікамі не толькі для мяне, але і для іншых дыспетчараў. Гэта ветэран беларускай энергасістэмы Галіна Атрашкевіч, якая і зараз працуе на Рудзенскім вытворчым участку, Галіна Атрашкевiч і Міхаіл Вераскоўскі.

Калектыў Пухавіцкага РЭС абслугоўвае адзінаццаць падстанцый у зоне нашага раёна. Але, як прызналіся Святлана і яе калегі, двух аднолькавых змен у іх ніколі не бывае. За гэта, нягледзячы на многія складанасці, яны і любяць сваю працу.

Кацярына ДАБРЫЦКАЯ.