Людміла Бельская распавяла, што ў мінулым годзе ў аддзел па працы са зваротамі грамадзян і юрыдычных асоб райвыканкама паступіла 748 зваротаў. Большасць з іх звязаныя з працай жыллёва-камунальнай гаспадаркі, дзейнасцю садаводчых таварыстваў (у нашым раёне іх 163), з пытаннямі землеўпарадкавання. Людміла Аляксандраўна падкрэсліла, што адказы на ўсе пытанні павінны быць пісьменнымі, а ўсе праблемы, якія магчыма, павінны вырашацца на месцы.

Значна спрашчае многія адміністрацыйныя працэдуры для пухаўчан служба "Адно акно", створаная ў канцы лістапада мінулага года. Яе спецыялісты гатовыя даць пісьменную кансультацыю па розных пытаннях не толькі на месцы, але і па тэлефоне 142.

Начальнік РАУС Павел Кастрыцкі свой выступ пабудаваў у форме дыялогу. Работнікі ААТ "Машхарчпрад" звярнулі ўвагу на неабходнасць пешаходнага пераходу каля іх адміністрацыйнага будынка. Ён будзе карысны не толькі для работнікаў прадпрыемства, але і многіх жыхароў мікрараёна «Крыніца», якія спяшаюцца на аўтобус і перабягаюць дарогу ў неналежным месцы. У ліку агучаных прапаноў: зрабіць тратуар каля прыпынку, "падсвятліць" пешаходны пераход, які знаходзіцца па вуліцы Паслядовіча за крамай «Крыніца», усталяваць дублюючыя знакі на расцяжцы перад пераездам, бо многія немясцовыя кіроўцы іх не заўважаюць і парушаюць правілы. Начальнік РАУС паабяцаў накіраваць абавязковыя да выканання прадпісанні ў адпаведныя арганізацыі і прадпрыемствы.

Павел Кастрыцкі нагадаў усім пешаходам аб неабходнасці пазначаць сябе святлоадбіўнымі элементамі ў цёмны час сутак, а вадзіцелям — аб захаванні хуткаснага рэжыму. У 2018 годзе ў раёне ў ДТЗ загінулі 11 чалавек, 43 атрымалі раненні.

Аб асноўных прычынах пажараў распавёў першы намеснік начальніка Пухавіцкага РАНС Ігар Барадзько. У рамках акцыі "Бяспека - у кожны дом", якая гэтымі днямі праходзіць у нашым раёне, усім удзельнікам сустрэчы ўручылі тэматычныя буклеты. Аб правілах бяспекі калектыву прадпрыемства нагадалі пры дапамозе тэматычнага відэароліка.

Кацярына ВЕРНIКОЎСКАЯ.