- Сёлета ў лыжні ўдзельнічала 11 каманд з устаноў адукацыі нашага раёна — - распавядае старшыня Пухавіцкага райкама Беларускага прафесійнага саюза работнікаў адукацыі і навукі Таццяна Шавель. - Надвор'е ў нядзелю, праўда, не вельмі нас парадавала: усім хацелася сонечнага студзеньскага настрою. Яго прыйшлося ствараць самім, так як сонечнымі днямі зіма не песціць. І ў нас атрымалася, таму што на лыжню выйшлі ўсе з энтузіязмам і жаданнем паказаць добры вынік.
Па выніках лыжных забегаў першае месца заваявала каманда ДУА "Дрычынская базавая школа". Педагог па фізічнай культуры Валеры Качаргін здолеў падрыхтаваць і матываваць калегаў так, што роўных ім у гэтым годзе не аказалася.
Сам выйшаў на лыжню і капітан каманды, старшыня прафсаюзнага камітэта ДУА "Рудзенская сярэдняя школа" Дзяніс Гаваркоўскі. Яго падтрымалі калегі. І агульны вынік парадаваў: каманда стала другой.
Трэцяе месца ў гэтым годзе дасталася педагогам з ДУА "Сярэдняя школа №4 г. Мар'іна Горка", якіх рыхтавала Ганна Чумак.
- Гэтыя каманды штогод паказваюць добрыя вынікі, - кажа Таццяна Шавель. - Пры гэтым выступаюць не адным і тым жа складам. Значыць, ведаюць сакрэт таго, як змагацца і перамагаць.
Адным з самых падрыхтаваных лыжнікаў апынуўся дырэктар ДУА "Мар'інагорская гімназія" Сяргей Зінкевіч. Ён паказаў вельмі добры вынік ў сваёй узроставай катэгорыі.
А самым актыўным і пазітыўным заўзятарам назвалі дырэктара ДУА "Сярэдняя школа №2 г. Мар'іна Горка" Дзіну Паўлаву. Яна шчыра падбадзёрвала не толькі сваіх калегаў, але і кожнага, хто ў гэты дзень стаў на лыжы.
Алена Іванова.
