З дакладам аб выніках працы Пухавіцкага РАУС за мінулы год выступіў начальнік аддзела Павел Кастрыцкі. Ён адзначыў, што па шэрагу напрамкаў дзейнасці міліцыі ў Пухавіцкім раёне захоўваецца станоўчая дынаміка ў параўнанні з папярэднімі перыядамі. У мінулым годзе на тэрыторыі раёна не было здзейснена крадзяжоў аўтамабіляў, на 15,4 адсотка знізілася колькасць рабаванняў. Агульная колькасць зарэгістраваных крадзяжоў зменшылася на 3,2 адсотка, а статыстыка зарэгістраваных фактаў махлярства скарацілася на 71,4 адсотка. Адзначаецца зніжэнне колькасці злачынстваў, учыненых непаўналетнімі.
Павышаецца выніковасць працы РАУС па барацьбе з незаконным абаротам наркотыкаў, па ўзбуджэнні крымінальных спраў прэвентыўнай накіраванасці, па ізаляцыі ў ЛПП асоб, якія пакутуюць на алкагалізм. Зменшылася і колькасць рэцыдыўных злачынстваў.
Праўда, не ўсе лічбы, якія характарызуюць крымінагенную абстаноўку ў раёне, узровень работы па прафілактыцы і спыненні правапарушэнняў і злачынстваў, маюць станоўчае статыстычнае параўнанне. У 2018 годзе ў раёне было здзейснена 33 злачынствы, якія адносяцца да катэгорыі цяжкіх і асабліва цяжкіх. Два з гэтых злачынстваў застаюцца нераскрытымі. Гэта факт усталявання ў лесапаласе паблізу вёскі Зацітава Слабада выбуховага прыстасавання тыпу міны-пасткі і разбойны напад на жыхара аграгарадка Наваполле.
У структуры злачынстваў па лініі крымінальнага вышуку працягваюць пераважаць крадзяжы. І хоць агульная іх колькасць з 500 у 2017 годзе знізілася да 484 у 2018-м, яно застаецца адным з самых вялікіх у вобласці. Аднак тут варта адзначыць такі фактар, як наяўнасць велізарнай колькасці лецішчаў, большасць з якіх належыць жыхарам Мiнска. Нездарма Пухавіцкі раён называюць дачным рэгіёнам сталіцы. Многія гаспадары дач грэбліва ставяцца да справы забеспячэння захаванасці сваёй маёмасці: адмаўляюцца ад паслуг Дэпартамента аховы па падлучэнні сістэмы ахоўнай сігналізацыі, не знаходзяць час нават усталяваць моцныя дзверы, надзейныя завалы, металічныя рашоткі на вокнах. У той жа час пакідаюць на дачах дарагія рэчы, а самі доўгі час там не пражываюць. Па-дурному спадзявацца, што магчымасцю здзейсніць крадзеж ніхто не скарыстаецца. Як вынік - летась у раёне было зарэгістравана 85 дачных крадзяжоў, з якіх раскрыта толькі 28. Значна ўскладняе раскрыццё падобных злачынстваў тая акалічнасць, што многія дачнікі паведамляюць у міліцыю аб крадзяжах толькі пасля таго, як праз некалькі тыдняў ці месяцаў прыязджаюць на сваю дачу.
У цэлым жа раскрывальнасць злачынстваў па лініі крымінальнага вышуку летась склала 55,1 працэнта, што на 4,4 працэнта вышэй, чым у 2017 годзе, аднак гэты паказчык яшчэ саступае сярэдняму абласному (63,9 працэнта).
Павел Кастрыцкі таксама адзначыў, што па-ранейшаму для Пухавіцкага рэгіёну застаецца актуальным пытанне забеспячэння дарожнай бяспекі, тэмы процідзеяння эканамічным злачынствам і злачынстваў карупцыйнай накіраванасці. Патрабуючай карэкцыі прызнана дзейнасць аддзела крымінальнага вышуку, аддзела аховы правапарадку і прафілактыкі, аддзялення па барацьбе з эканамічнымі злачынствамі.
Асаблівую ўвагу, на думку начальніка Пухавіцкага РАУС, варта звярнуць на кадравае камплектаванне аддзела, умацаванне службовай дысцыпліны супрацоўнікаў, высокі ўзровень якой з'яўляецца гарантам павышэння эфектыўнасці аператыўна-службовай дзейнасці любога падраздзялення.
З справаздачамі аб выніках работы выступілі намеснікі начальніка РАУС, якія падрабязна асвятлілі як станоўчыя тэндэнцыі ў курыруемых падраздзяленнях, так і праблемы і шляхі іх вырашэння.
Намеснік начальніка ўпраўлення ўнутраных спраў Мінскага аблвыканкама Ігар Прышчэпскі, падводзячы вынікі нарады, адзначыў, што для дасягнення стабільных вынікаў у раскрыцці злачынстваў патрабуецца рэгулярны і глыбокі аналіз крымінагеннай абстаноўкі. Гэта дапаможа больш дакладна вызначыцца з базіснымі прычынамі і сфармаваць канцэпцыю дзейнасці. У прыватнасці, ён паказаў на неабходнасць больш цеснага ўзаемадзеяння падраздзяленняў і службаў раённага аддзела міліцыі пры ўстанаўленні асоб, якія ўчынілі злачынствы, а таксама ўцягванне ў гэтую працу супрацоўнікаў страявых падраздзяленняў, у тым ліку выкарыстоўваць магчымасці абласнога АМАП.
У цэлым, кіраўніцтва ўпраўлення ўнутраных спраў Мінскага аблвыканкама дало станоўчую ацэнку рабоце міліцыі Пухавіцкага раёна па рашэнню задач барацьбы з злачыннасцю, умацаванню правапарадку, падтрымання бяспекі ў грамадстве.
Ва ўрачыстай абстаноўцы былі адзначаны супрацоўнікі РАУС, якія дасягнулі высокіх вынікаў у службовай дзейнасці. Медалём "За бездакорную службу" 3-й ступені ўзнагароджаны намеснік начальніка Свіслацкага аддзялення міліцыі Вячаслаў Варабей. Ганаровая грамата УУС Мінскага аблвыканкама ўручана начальніку аддзялення інфармацыйнага забеспячэння Наталлі Тарнагурскай, грамата - старэйшаму ўчастковаму інспектару міліцыі Фёдару Русовічу. Аб'яўлена падзяка начальніка міліцыі Мінскай вобласці памочніку дзяжурнага аператыўна-дзяжурнай службы Свіслацкага аддзялення міліцыі Аляксею Вайцяховічу.
За добрасумленнае выкананне службовых абавязкаў і дасягненне высокіх паказчыкаў у працы аб'яўлена падзяка начальніка РАУС інспектару дарожна-патрульнай службы Валерыю Каржу, оперупаўнаважанаму аддзела крымінальнага вышуку Уладзіславу Гальчуку, оперупаўнаважанаму групы па наркакантролі і супрацьдзеянні гандлю людзьмі Вадзіму Алентэю, міліцыянту-канваіру ІЧУ Арцёму Голубу, опер-упаўнаважанаму аддзялення па барацьбе з эканамічнымі злачынствамі Антону Гілеўскаму.
Паспяховая праца супрацоўнікаў Пухавіцкага РАУС адзначана і раённым выканаўчым камітэтам. Падзяку аб'яўлена Уладзіміру Лабушу, Мікалаю Беламу, Аляксандру Якімавічу, Сяргею Калесневу, Валерыю Абакунчыку, Дзмітрыю Чыбісаву, Галіне Кунец, Наталлі Нікалаенка.
Андрэй Мазанік.