Вадзіцель Уладзімір Паддубоцкі і механізатар Міхаіл Грышук.

Бульбаўборачныя камбайны гэтымі днямі можна ўбачыць на палях ЭБ “Зазер’е” і СУП “Дукора—Агра”. На дукорскіх землях бульбу для патрэб свайго прадпрыемства традыцыйна вырошчвае ААТ “Машхарчпрад”. “Другі хлеб” сёлета займае плошчу  545 гектараў.

Уборку  пачалі з нямецкага гатунку “піроль”, які займаў 70 гектараў. Другі год     гэты сярэдня-спелы гатунак ідзе на вытворчасць чыпсаў “Zlato chips”, якія вырабляюцца з сырой бульбы.

— У гэтым годзе мы набылі французскі гатунак “аўрэя” таксама для вытворчасці такіх чыпсаў. Пакуль вырошчваем яго на насенне, а на будучы год будзем садзіць, — расказвае першы намеснік дырэктара ААТ “Машхарчпрад” Дзмітрый Лімараў. — На насенне нам патрэбна 2,5 тысячы тон бульбы. Асноўным аб’-ёмам забяспечваем сябе самі. Штогод набываем насенне для сортаабнаўлення. Напрыклад, у гэтым годзе набылі таксама эліту “брыза”, “журавінкі”.

Гэтыя беларускія гатункі атрымалі пастаянную прапіску на дукорскіх палях. “Журавінка” — аптымальны гатунак для вырабу сухога пюрэ, якое складае асноўны аб’ём вытворчасці прадпрыемства. Пад яго адведзена 250 гектараў. “Брыз” у асноўным ідзе на продаж, у тым ліку і за мяжу. Таксама ў спісе гатункаў бульбы — нямецкі “каралева Ганна”.

Ураджайнасць бульбы сёлета складае 310 цэнтнераў з гектара. У параўнанні з мінулым годам гэта амаль на 25-30 працэнтаў ніжэй. Усе работы земляробы выконвалі згодна з тэхналогіяй і ў аптымальныя тэрміны,  аднак сельская гаспадарка — непрадказальная галіна вытворчасці. На ўра-джайнасць паўплывалі ўмовы надвор’я.

Нягледзячы на гэта, бульбасховішчы прадпрыемства штодзень запаўняюцца новым ураджаем. На палях працуюць чатыры бульба-ўборачныя камбайны. Кіруюць імі Уладзімір Грышук, Міхаіл Грышук, Андрэй Лукашонак і Яўген Насевіч. Яны ж вясной займаліся падрыхтоўкай глебы, унясеннем мінеральных удабрэнняў і пасадкай бульбы. У гэтым спісе сярод вопытных механізатараў вылучаецца Яўген Насевіч. Ён першы год задзейнічаны на ўборцы бульбы. Малады чалавек расказаў, што спачатку было цяжка. А цяпер прывык да тэхнікі. У звяне з ім працуе памочнік Вячаслаў Гузарэвіч.

Вадзіцелі Сяргей Ганчарык і Віктар Лапко.

Моцную каманду складаюць вадзіцелі. Штодзень яны робяць дзясяткі рэйсаў. Як і механізатары, у такую напружаную пару працуюць без выхадных.

Уладзімір Паддубоцкі праводзіць свой адзінаццаты сезон на адвозцы бульбы. Яму, як аднаму з лепшых вадзіцеляў, сёлета даверылі новы магутны МАЗ. За адзін рэйс на аўтамабілі можна перавезці да 20 тон бульбы.

Механізатар Яўген Насевіч.

З лепшага боку зарэкамендавалі сябе таксама вадзіцелі Аляксей Максімовіч, Аляксей Лабода, Алег Жаўнерчык, Юрый Міленцьеў, Леанід Арэшчанка, Віктар Лапко, Сяргей Ганчарык. На важным участку працуе Віктар Емяльяненка. Яго задача — прыбіраць бацвінне.

Для сваіх патрэб прадпрыемству патрэбна каля 22 тысяч тон бульбы. Завяршыць уборку “другога хлеба” земляробы плануюць да 15 кастрычніка.

Кацярына  ВЕРНІКОЎСКАЯ.