«Зіма - гэта не толькі Новы год, снег, катанне на каньках па лёдзе і зімовая рыбалка, але і небяспека.
Такія забаўкі як катанне на каньках на натуральным лёдзе, зімовая рыбалка нярэдка заканчваюцца трагедыяй, бо людзі часта пераацэньваюць трываласць лёду, а таксама не ведаюць, як паводзіць сябе ў экстрэмальных сітуацыях.
Для таго, каб засцерагчы сябе падчас рыбалкі ў першую чаргу неабходна абраць правільны рыштунак. Важна выбраць не толькі зручную скрыню, рыбалоўныя снасці, але і правільную вопратку, ідэальным выбарам будзе касцюм «паплавок» - у выпадку, калі вы праваліцеся пад лёд, ён не дасць Вам сысці пад ваду, а будзе трымаць Вас на плаву, як надзіманы матрац.
Асоба важна мець пры сабе індывідуальныя сродкі выратавання, неабходнымі з'яўляюцца спецыяльныя дзяржальні з шыпамі, якія дапамагаюць чапляцца за лёд, каб выпаўзці з вады на паверхню дадзены сродак выратавання павінен быць на кожным рыбаку.
Ключавымі атрыбутамі зімовай рыбалкі з'яўляюцца ледабур (для свідравання лёду) і пешня (для праверкі яго трываласці).
Акрамя таго, неабходна мець пры сабе вяроўку, але не для ўласнага выратавання, а ў выпадку, калі давядзецца выцягваць з вады кагосьці іншага, рэкамендуецца выкарыстоўваць 5-7 метровую вяроўку, з пятлёй і грузікам на канцы, каб яна не выслізнула з рук. Такую вяроўку можна зматаць у клубок і пакласці ў кішэню.
Пракуратура Пухавіцкага раёна нагадвае, што аптымальная таўшчыня лёду павінна складаць мінімум 10 см.
У выпадку, калi вадаём незнаёмы, то па ім варта перасоўвацца асцярожна, правяраючы крэпасць лёду пры дапамозе ўдараў пешняй. Калі пешня не прабіла лёд, ён лічыцца моцным. А калі прабіла – неабходна неадкладна развярнуцца і сысці ў той бок, адкуль Вы прыйшлі.
Калі па лёдзе ідзе ланцужком група рыбакоў, то яе заўсёды адкрывае або замыкае самы цяжкі чалавек (у залежнасці ад напрамку: калі ад берага, то цяжкавагавік павінен быць наперадзе, калі да берага, то ззаду).
У выпадку, калі Вы праваліліся пад лёд важна не панікаваць. Парадак дзеянняў у такой сітуацыі наступны:
- Знаходзячыся ў вадзе, развярнуцца ў той бок, адкуль Вы прыйшлі.
- Размясціцца ў палонцы гарызантальна. Занесці на лёд спачатку плечавы пояс, а затым сагнутую нагу, і перакатам выпаўзці вонкі.
- Выкарыстоўваць індывідуальны выратавальны сродак – для гэтага ён павінен быць надзеты на Вас падчас рыбалкі.
Памочнік пракурора Пухавіцкага раёна Ілля Васільеў.
