Любы грамадзянін, які знаходзіцца ў пошуку працы, пры звароце ў службу занятасці можа атрымаць садзейнічанне ў працаўладкаванні незалежна ад таго, ці зарэгістраваны ён у якасці беспрацоўнага. Грамадзянам, якія звярнуліся, прапануюцца варыянты працаўладкавання, падабраныя ў агульнарэспубліканскім банку вакансій (http://www.gsz.gov.by), які фарміруецца на падставе прадстаўленых наймальнікамі звестак. У базе даных органаў па працы на сённяшні дзень ёсць звесткі аб 938 свабодных рабочых месцах (вакансіях) у арганізацыях раёна. Больш за 60% вакансій заяўлена па працоўных прафесіях.
Грамадзянам, зарэгістраваным у якасці беспрацоўных, прапануецца больш шырокі спектр паслуг. Так, дзяржава гарантуе беспрацоўным: бясплатнае навучанне па запатрабаваных на рынку працы прафесіях, садзейнічанне ў арганізацыі ўласнай справы, садзейнічанне ў набыцці вопыту практычнай работы, у перасяленні ў сувязі з пераездам на новае месца жыхарства і работы з выплатай грашовых сродкаў, у адаптацыі інвалідаў да працоўнай дзейнасці, прадастаўленне сацыяльных выплат, бясплатны медагляд пры прыёме на працу і накіраванні на навучанне, магчымасць удзелу ў аплатных грамадскіх работах.
Аддзелам занятасці праводзіцца набор беспрацоўных грамадзян для навучання па прафесіях: повар, цырульнік, майстар па манікюры, электрагазазваршчык, прадпрымальніцкая дзейнасць і інш. Усім навучэнцам са сродкаў Фонду сацыяльнай абароны насельніцтва Рэспублікі Беларусь аплачваецца навучанне, праезд або пражыванне ў інтэрнаце. Падчас навучання выплачваецца стыпендыя.
Беспрацоўны з яго згоды можа быць накіраваны на навучанне ў адпаведнасці з заяўкай канкрэтнага наймальніка, які гарантуе яго працаўладкаванне пасля завяршэння поўнага курса навучання.
Грамадзяне, якія маюць групу інваліднасці, могуць прайсці навучанне па прафесіі «Аператар ПЭВМ з веданнем кампутарнай вёрсткі, графікі і дызайну», .
Службай занятасці беспрацоўным для арганізацыі прадпрымальніцкай дзейнасці, дзейнасці па аказанні паслуг у сферы аграэкатурызму, рамеснай дзейнасці прадастаўляецца субсідыя. Субсідыя - аднаразовая бязвыплатная дапамога дзяржавы на набыццё абсталявання, прылад, сыравіны, матэрыялаў і інш. у памеры:
11-разовай велічыні бюджэту пражытачнага мінімуму для жыхароў гарадоў і гарадскіх пасёлкаў - 3 168,11 бел. руб.;
15-разовай велічыні бюджэту пражытачнага мінімуму для жыхароў сельскіх населеных пунктаў - 4 320,15 бел. руб.
За дадатковай інфармацыяй звяртацца ў аддзел занятасці тэл. 51840, 51839, 51934, 51933 г. Мар'іна Горка, вул. Новая Зара, д. 22а.