Яшчэ зусім нядаўна на полі гаспадарылі камбайны, а ўжо сёння працуюць трактары з плугамі і сеялкамі. Стартавала сяўба азімых зерневых. Гэта не менш важная кампанія, у час якой закладваецца будучы ўраджай. І ён залежыць ад строгага выканання ўсяго тэхналагічнага ланцужка.
У ААТ «Пухавіцкі райаграсэрвіс» сеяць азімыя збожжавыя сёлета пачалі ў лепшыя агратэхнічныя тэрміны. На падрыхтоўцы глебы зараз працуюць Васіль Шпакоўскі і Анатоль Котаў. А на трактары з сеялкай шчыруе Андрэй Мохараў. У дзень трактарыст-машыніст сее да 30 гектараў.
План азімай сяўбы ў гаспадарцы, як і ў мінулым годзе, складае 1500 гектараў. 300 гектараў зойме ячмень, 420 — пшаніца, 680 — трыцікале.
Пад азімыя ўносяць поўны комплекс мінеральных удабрэнняў: азот, фосфар, калій.
— Для сяўбы азімых цяпер самы спрыяльны час, — адзначае галоўны аграном ААТ «Пухавіцкі райаграсэрвіс» Валерый Сасіноўскі. — Калі пасеяць раней за тэрмін, расліна перарасце і будзе хварэць, калі пазней — не паспее прайсці неабходнае гартаванне да наступлення зімы. Расліны павінны сысці ў зімоўку ў фазе кушчэння, таму першай пачалі сеяць азімую пшаніцу.
Насенне да сеялкі, на якой працуе Андрэй Мохараў, падвозіць Ігар Прохараў. У такім тандэме хлопцы працавалі і на вясновай пасяўной. У дзень вадзіцель робіць 2-3 рэйсы.
Акрамя пасяўной у гаспадарцы зараз актыўна вядуцца іншыя работы: ідзе сяўба траў, пад сяўбу азімых і яравых уносяцца гліфасаты. Ужо ўнеслі іх на плошчы 650 гектараў. Акрамя таго, пачынаецца ўборка кукурузы, 1000 гектараў з якой пойдзе на сілас і 200 гектараў — на зерне.
Анастасія ПЛЯТНЁВА.
Источник: https://www.gorka.by/selgasarganizacyi-pachali-sya%D1%9Ebu-azimyx-zernevyx/
