На МТФ “Блонь” старшыня райкама прафсаюза работнікаў АПК Людміла Ленкавец завітала разам з намеснікам начальніка аддзела вытворчасці і рэалізацыі прадукцыі ўпраўлення па сельскай гаспадарцы і харчаванні Паўлам Бакіноўскім. Яны ўручылі падарункі загадчыцы фермы Вользе Цэгла і ветфельчару Уладзіміру Лосічу. Да віншаванняў далучыўся і прафсаюзны камітэт сельгаспрадпрыемства. Выконваючы абавязкі дырэктара Віктар Коршунаў і старшыня прафкама гаспадаркі Надзея Салоха адзначылі, што ўзнагароды атрымаюць самыя вопытныя і неабыякавыя да справы людзі. Гэта аператар машыннага даення Таццяна Федарынчык, стаж працы якой набліжаецца да трыццаці гадоў, жывёлавод Раіса Сахончык і слесар Мікалай Гайдук.
Шмат добрых слоў было сказана ў адрас калектыву малочнатаварнай фермы “Пухавічы”. Не першы раз у рамках гэтай акцыі віншаванні прымала жывёлавод Наталля Лапіцкая. Для аператара машыннага даення Зінаіды Петрусевіч, якая працуе на ферме з 2004 года, гэта ўзнагарода стала першай.
Яшчэ адна падзяка за працу з’явілася ў тэхніка-асемянатара Ірыны Сімаковіч. Ірына Іванаўна адказвае за ўзнаўленне статку на малочнатаварных фермах “Пухавічы” і “Зацітава Слабада”. Па выніках 2018 года выхад цялят на сто кароў на фермах у сярэднім склаў 86 працэнтаў. На гэты год спецыяліст ставіць мэту палепшыць свае паказчыкі.
— На ферме я працую ўжо сем гадоў. Вырасла на Пухавіччыне, затым пераехала ў Мінск. Склалася так, што вярнулася дадому. Як кажуць, дзе нарадзілася, там і згадзілася, — з усмешкай гаворыць Ірына Сімаковіч. — Мая маці ў свой час працавала ў “Індустрыі”. Раней я з жывёлагадоўляй не была звязана, але цяпер працягваю сямейную дынастыю.
Аператар машыннага даення Валянціна Крывіцкая.
У ААТ “Аграсімвал” акцыя “Наш жывёлавод” супала з падвядзеннем працоўных вынікаў за мінулы год. За добрасумленную працу Людміла Ленкавец і намеснік начальніка ўпраўлення па сельскай гаспадарцы і харчаванні Ірына Федаровіч падзякавалі жывёлаводам МТК “Бор” Надзеі і Міхаілу Халадок, Уладзіміру Грыньку і аператару машыннага даення Валянціне Крывіцкай.
— Дванаццаць гадоў я працую на ферме на адной групе. Цяпер у меня 48 кароў, — расказвае Валянціна Аляксандраўна, якая з’яўляецца адным з лідараў у гаспадарцы па надоях. — Хутка надыдзе час заслужанага адпачынку, але пакуль дазволіць здароўе, буду працаваць.
У прысутнасці калектыву дырэктар гаспадаркі Юрый Плешавеня ўзнагародзіў Наталлю Елішэвіч, Тамару Смычкову, Наталлю Герман як лепшых аператараў машыннага даення. Па вытворчых паказчыках за мінулы год вызначыліся таксама жывёлаводы Святлана Баёк, Зінаіда Леўчык, тэхнік-асемянатар Вольга Фіневіч. Загадчыцу МТФ “Гарэлец” Зінаіду Цымановіч і начальніка МТК “Бор” Сафію Рымша ўзнагародзілі за шматгадовую і добрасумленную працу.
Кацярына ДАБРЫЦКАЯ.
