Традыцыйная народная культура яскрава вылучаецца нацыянальнай самабытнасцю. Гэта адзін з найбольш важных спосабаў самавыяўлення кожнага народа. Асабліва прыкметна ўзрастае яе роля ў наш час—у перыяд аб’яднання народа, станаўлення дзяржаўнага суверэнітэту. Гэты неацэнены нацыянальны набытак даўно страчаны многімі еўрапейскімі народамі.
Адной з цікавейшых крыніц народнай культуры з’яўляецца кніга беларускіх вучоных-фалькларыстаў Янкі Крука і Вольгі Катовіч ”Залатыя правілы народнай культуры”. Кніга прысвечана правілам кожнага дня года і найбольш значных каляндарных святаў. Тут сабраны цікавейшы матэрыял аб правілах паводзін чалавека, сям’і, рода, звязаных з падрхтоўкай і правядзеннем сямейных абрадаў.
Народная культура - гэта своеасаблівая мова зносін продкаў з навакольным асяроддзем. Гэта мова складаная, падчас сімвалічная. Сучаснікам яна не зусім зразумелая. З цягам часу мы развучыліся разумець мову прыроды і мову культуры. Таму нам цяпер трэба прыкласці нямала намаганняў, каб навучыцца зноў разумець і любіць сваю нацыянальную культуру. Гэта яна з’яўляецца асновай выхавання падрастаючага пакалення.
Бібліятэкары Свіслацкай гарпасялковай бібліятэкі запрасілі юнакоў і дзяўчат ў фальклорна-гістарычны экскурс “Залатыя правілы народнай народнай культуры” па аднайменнай кнізе Я.Крука і В.Катовіч. Праходзіў ён у “Кутку роднай спадчыны”, які знаходзіцца ў літаратурным салоне Свіслацкай гарпасялковай бібліятэкі. Варта адзначыць, што шматлікія экспанаты, якія тут знаходзяцца, зусім невядомыя моладзі. Тым цікавей было для іх знаёмства з рэчамі даўняга беларускага побыту. Удзельнікі сустрэчы выказалі сваё пажаданне—яшчэ неаднойчы наладзіць падарожжа ў гісторыю беларускай нацыянальнай культуры.
