На працягу жніва Інэса Вашкевіч жыла па рабочым графіку мужа-камбайнера: працавала разам з ім на палях ПСУ “Рудзенскае”. Сямейны экіпаж Артура і Інэсы Вашкевічаў увайшоў у лік тысячнікаў раёна.
Артур Мікалаевіч — вадзіцель УП “Жылцепласэрвіс” КГ. Трэці сезон падчас уборкі збожжавых мяняе звыклы аўтамабіль на камбайн. З жонкай працуе другі год.
— Разам нам камфортна, — гаворыць ён. — Жанчына і камбайн — абсалютна сумяшчальныя рэчы. Інэса мае правы адпаведнай катэгорыі, умее кіраваць трактарам. Акрамя таго, яна ў свой час атрымала адукацыю агранома, таму працэс уборкі збожжавых ведае вельмі добра.
Агульны стаж Артура Вашкевіча як камбайнера перавышае дзесяць гадоў. З 1999 па 2000 год ён працаваў у саўгасе “Рудзенскі”. Убіраць збожжа пачынаў яшчэ на “Ніве”. Цяперашні КЗС-1218 з тым камбайнам не параў-наць: кіраваць ім лёгка, у кабіне ўсталяваны кандыцыянер, значна аблягчае працу бартавы камп’ютар. Артура Мікалаевіча ў “Рудзенскім” ведаюць як адказнага і працавітага чалавека, таму запрашаюць на жніво.
— Калі ў наступным годзе паклічуць, таксама з радасцю дапамагу, — гаворыць Артур Вашкевіч. — Сёлета на палях працаваў з задавальненнем. Ураджайнасць склала каля 30 цэнтнераў з гектара, ды і з тэхнікай сур’ёзных праблем не было.
Цяпер Артур Мікалаевіч прыступіў да сваіх звыклых абавязкаў на камунальным прадпрыемстве. Але на мехдвор гаспадаркі завітае ў бліжэйшы час: трэба паставіць камбайн на захоўванне.
Кацярына ВЕРНІКОЎСКАЯ.
