Узняццем зябліва на вецярэвіцкіх палях займаюцца вопытныя земляробы Аляксандр Бахур, Сяргей Кроцік і Аркадзь Врублеўскі. Аркадзь Міхайлавіч штогод задзейнічаны на ворыве і сёлета ўвайшоў у лік пераможцаў раённага спаборніцтва на вясенне-палявых работах. Працуе перадавік на няпростых тарфяных землях. Норма выпрацоўкі для яго агрэгата складае 13 гектараў. Ён жа штодзень дыскуе больш за 20 гектараў.
Звыш нормы працуюць таксама Аляксандр Бахур і Сяргей Кроцік. Да іх трактароў прычэплены плугі, якімі вядуць ворыва на мінеральных землях. Норма выпрацоўкі - 17 гектараў, аднак механізатары штодзень стабільна ўзорваюць да 25 гектараў.
- На ўзняцці зябліва задзейнічаны адны з лепшых нашых механізатараў. Яны зацікаўлены і ў працы, і ў заробку, да работы ставяцца адказна, стараюцца, — расказвае галоўны аграном Паліна Заяц. — Таксама зараз уносім калійныя ўдабрэнні. Тэмпы восеньскага ворыва крыху стрымліваюць паломкі тэхнікі, але, нягледзячы на гэта, мы плануем своечасова справіцца з планам.
Усе земляробы ведаюць, што своечасовае правядзенне восеньскага ворыва — гарантыя добрага ўраджаю. Узняцце зябліва паскарае падрыхтоўку да веснавой сяўбы і гарантуе хуткае ўключэнне ў пасяўную кампанію. Таксама гэты тэхналагічны прыём прадухіляе рост пустазелля.
Разам з ААТ “Вецярэвічы” лідзіруючыя пазіцыі ў раёне на ўзняцці зябліва займаюць адкрытыя акцыянерныя таварыствы “Агра-Абярэг”, “Племянны завод “Індустрыя”, “Зазерка”, “Голацк” і СУП “Дукора-Агра”.
Кацярына ДАБРЫЦКАЯ