У сераду, калі ярка свяціла сонца і абдымаў цёплы летні вецер, у нашым раёне ў поле выехалі першыя камбайны. Быў дадзены старт галоўнай сельскагаспадарчай кампаніі года — уборцы ўраджаю.
Вывелі камбайны ў поле аграрыі ААТ «Агра-Абярэг», «Энергія Агра», «Новы Бор», «Індустрыя-СГ», СУП «Дукора-Агра». У астатніх гаспадарках плануюць уключыцца ва ўборачную на наступным тыдні.
Убіраюць першай культурай, якая саспела раней за астатнія, азімы ячмень. Больш за ўсіх — 407 гектараў — вырасцілі яго ў ААТ «Індустрыя-СГ». 325 гектараў адвялі пад азімы ячмень аграрыі ААТ «Зазерка», 264 гектары — у СУП «Дукора-Агра» і ААТ «Вецярэвічы».
Як сцвярджаюць аграномы, азімы ячмень менш за іншых схільны да засухі і ў апошнія гады дае высокія ўраджаі. Таму ёсць спадзяванне, што засушлівае на-двор’е, якое стаяла ў маі і чэрвені, не адбілася на ўраджайнасці гэтай культуры. З першых убраных гектараў у ААТ «Агра-Абярэг» атрымалі 50 цэнтнераў збожжа, у ААТ «Энергія Агра» — 40 цэнтнераў з гектара, у ААТ «Інду-стрыя-СГ» — 37,1 цэнтнера.
Ва ўпраўленні па сельскай гаспадарцы і харчаванні райвыканкама адзначылі, што пачаты ўборачны працэс дазволіць земляробам сельгасарганізацый праверыць гатоўнасць камбайнаў і зернесушыльных комплексаў, а ў выпадку неабходнасці хутка вы-правіць выяўленыя недахопы, каб да масавага жніва збожжавых каласавых культур быць у поўнай гатоўнасці. Услед за азімым ячменем пачнецца ўборка азімага рапсу, які таксама вырошчвалі ў некаторых гаспадарках.
Анастасія ПЛЯТНЁВА.