Напярэдадні Дня Незалежнасці Рэспублікі Беларусь ля брацкай магілы воінаў і ўдзельнікаў супраціўлення ў аграгарадку Блонь прайшоў мітынг
У ім прынялі ўдзел старшыня Блонскага сельвыканкама Алена Гнядзько, ваеннаслужачыя пятай асобнай брыгады спецыяльнага прызначэння, навучэнцы Блонскай сярэдняй школы, якія ў гэтыя дні аздараўляюцца ў абаронна-спартыўным лагеры «Абаронец». Прысутныя ўшанавалі памяць загінуўшых герояў хвілінай маўчання, усклалі кветкі.
Як расказала намеснік дырэктара ДУА «Блонская сярэдняя школа» і начальнік школьнага лагера Марына Паддубская, кругласутачны профільны абаронна-спартыўны лагер «Абаронец» на базе школы праводзіцца ўжо трэці год.
Сёлета ў ім аздараўляюцца 33 навучэнцы: 23 хлопчыкі і 10 дзяўчынак з 3 па 10 клас. Лагер такой скіраванасці — адзіны ў нашым раёне.
Праходзіць у цесным узаемадзеянні з вайсковай часткай. Для рабят праводзяцца мерапрыемствы на базе воінскай часткі: стральба, медыцынская падрыхтоўка, арыентаванне на мясцовасці.
Хлопчыкам і дзяўчынкам вельмі падабаецца ў лагеры. Ён карыстаецца папулярнасцю сярод навучэнцаў не толькі Блонскай школы, але і гарадскіх школ. Летась напярэдадні Дня Незалежнасці мы з дзецьмі ездзілі ва ўрочышча Баруслова ўшанаваць памяць герояў, а сёлета прынялі рашэнне сабрацца тут. Я лічу, што такія мерапрыемствы вельмі патрэбны для падрастаючага пакалення. Яны дапамагаюць выхаваць пачуццё патрыятызму і гонару за сваю краіну.
Анастасія ПЛЯТНЁВА.