Новы экспанат — мяшочак з зямлёй са спаленай вёскі Літавец Дзяржынскага раёна — папоўніў экспазіцыю, прысвечаную генацыду беларускага народа, у раённым краязнаўчым музеі ў Блоні. Яго перадалі ўдзельнікі велапрабегу “Дарогамі перамогі”, у якім прынялі ўдзел работнікі сістэмы адукацыі раёна.
Літавец раздзяліла лёс Хатыні. У 1943 годзе ў ходзе правядзення маштабнай карнай аперацыі “Якаб” яна была цалкам знішчана: фашысты спалілі 42 двары і расстралялі ўсіх 196 жыхароў. Пасля вайны вёска ўжо не аднавілася. У 1956 годзе актывісты ўсталявалі малы помнік на месцы населенага пункта. У 1986 годзе на тэрыторыі паўстаў мемарыяльны комплекс. Зараз сюды наведваюцца людзі з усіх куткоў краіны. Пабывалі ў гэтым трагічным месцы і пухавіччане.
“Вогненныя сёстры” ў вёскі Літавец ёсць і ў нашым раёне. Інфармацыя аб іх зме-шчана ў экспазіцыі, прысвечанай генацыду беларускага народа. Дарэчы, спіс спаленых вёсак у апошні час папоўніўся, бо ў межах расследавання крымінальнай справы аб генацыдзе беларускага народа, якое праводзіць генеральная пракуратура, ад-крываюцца ўсё новыя факты. Зараз на карце спаленых вёсак раёна абазначана 127 населеных пунктаў.
Падчас велапрабегу яго ўдзельнікі ўспаміналі не толькі пра вогненныя вёскі. Яны наведалі месца самага масавага забойства мірнага насельніцтва ў гады Вялікай Айчыннай вайны на тэрыторыі нашага раёна — урочышча Папова Горка, дзе ў верасні 1941 года акупанты расстралялі 1260 чалавек яўрэйскай нацыянальнасці.
Наталля ПАРХОМЧЫК
