У Беларускім нацыянальным тэхнічным універсітэце адбыўся ХІ рэспубліканскі конкурс навукова-тэхнічнай творчасці “ТэхнаІнтэлект”. У склад каманды Мінскай вобласці ўвайшлі 24 навучэнцы, якія прадставілі ў секцыях свае навуковыя работы. У лік пераможцаў увайшоў і прадстаўнік нашага раёна. У секцыі «Мультымедыйныя тэхналогіі» 1-е месца заняў навучэнец Цэнтра творчасці дзяцей і моладзі «Світанак» Ілья Карніенка (кіраўнік Дзмітрый Крывашэй). Дарэчы, пераможцы конкурсу будуць рэкамендаваны да заахвочвання спецыяльным фондам Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў.
Каманда Мар’інагорскага аграрна-тэхнічнага каледжа атрымала дыплом III ступені ў конкурсе “Тэхнічнае забеспячэнне працэсаў сельскагаспадарчай вытворчасці” сярод навучэнцаў устаноў адукацыі, рэалізуючых навучальныя праграмы сярэдняй спецыяльнай адукацыі.
* * *
Праходзіць рэспубліканскі конкурс на лепшы дзіцячы малюнак на экалагічную тэматыку. На раённым этапе перамогу ў ім ва ўзроставай групе ад 6 да 10 гадоў атрымала вучаніца Ананіцкага навучальна-педагагічнага комплексу дзіцячы сад-сярэдняя школа Дамініка Сітнік: яе малюнак “Героі казак — за сарціроўку смецця” журы прызнала лепшым. Работа Дамінікі заняла ў другім, абласным, этапе конкурсу 2-е месца.
Наталля БАБУК.
