У гэтыя дні ў раёне актыўна вядзецца работа па добраўпарадкаванні помнікаў. Нядаўна вайскоўцы в/ч 89417, прадстаўнікі раённай арганізацыі “Беларускі саюз афіцэраў” аб’ядналі свае намаганні ў навядзенні парадку на воінскім пахаванні партызан і мірных жыхароў ва ўрочышчы Баруслава.
На добраўпарадкаванні тэрыторыі мемарыяла разам працавалі прадстаўнікі розных пакаленняў: маладыя салдаты і ветэраны Узброеных Сіл.
— У гэтым годзе Беларусь адзначае 75-годдзе Перамогі ў Вялікай Айчыннай вайне. Значная ўвага надаецца добраўпарадкаванню помнікаў і мемарыялаў, хаця для нашай арганізацыі гэта пастаянная работа, — падкрэслівае сакратар раённай арганізацыі “Беларускі саюз афіцэраў” Аляксандр Казак. — З 2012 года мы па сваёй ініцыятыве наводзім парадак на гэтым мемарыяле. Тут пахаваны байцы партызанскай брыгады “Полымя” і каля 350 мясцовых жыхароў з сямейнага лагера, які быў пры брыгадзе. Штогод у Баруслава прыязджаюць іх родныя. Гэта наша агульная памяць, якую мы павінны захаваць.
Кацярына ДАБРЫЦКАЯ.