Пухавіцкі раён на XVI фестывалі народнай творчасці Мінскай вобласці “Напеў зямлі маёй” прадставіць узорны хор “Мара” Мар’інагорскай дзіцячай школы мастацтваў.
Калектыў быў створаны ў 1988 годзе, у 2003 годзе яму было прысвоена званне “ўзорны”. Першым кіраўніком хору была Людміла Ажгірэй, канцэртмайстрам — Наталля Дзмітрук. З 2013 года ім кіруе загадчыца харавога аддзялення Іна Собаль.
Сёння ўдзельнікамі хору з’яўляюцца 52 выхаванцы Мар’інагорскай дзіцячай школы мастацтваў ва ўзросце ад 9 да 14 гадоў. Кіраўнікі калектыву імкнуцца прывіць ім любоў да творчасці, добры музычны густ.
“Мару” вылучае акадэмічная манера выканання. У рэпертуар уваходзіць руская і замежная класіка, духоўная музыка, апрацоўкі народных песень, музыка сучасных аўтараў. І якія б творы ні выконваў хор, дзіцячыя галасы “Мары” зачароўваюць слухачоў.
Хор вядзе актыўную канцэртную дзейнасць, прымае ўдзел у разнастайных конкурсах і фестывалях не толькі ў нашай краіне, але і за яе межамі. У 2007, 2010 і 2016 гадах ён станавіўся лаўрэатам III ступені абласнога конкурсу харавых калектываў, які праходзіць у горадзе Маладзечна. У скарбонцы ўзнагарод ёсць і дыпломы адкрытага рэгіянальнага фестывалю песні і музыкі «Майскі вальс» на прыз кампазітара Ігара Міхайлавіча Лучанка, які на працягу шэрагу гадоў праходзіў у Мар’інай Горцы: у 2012, 2014 і 2016 гадах калектыў атрымаў дыпломы лаўрэата I ступені, у 2013 годзе — дыплом лаўрэата II ступені. У 2016 і 2018 гадах хор станавіўся лаўрэатам міжнароднага фестывалю “Дзеці міру”, які праходзіць у Польшчы. У гэтым годзе атрымаў Супер-гран-пры на I Рэспубліканскім конкурсе “Дарога да мары”.
У фестывалі народнай творчасці Мінскай вобласці “Напеў зямлі маёй” узорны хор “Мара” прымае ўдзел другі раз. Упершыню гэта адбылося ў 2006 годзе. Дэбют быў паспяховым: калектыў стаў лаўрэатам II ступені. І ў гэтым годзе на фестывальнай сцэне ён будзе змагацца за права быць у ліку лепшых творчых калектываў сталічнай вобласці.