Як ты дорага мне, мая родная мова!
Мілагучнае, звонкае, спеўнае слова!
Ты калісьці з калыскі мяне падымала
I вучыла ў бацькоў на руках гаварыць.
У жыцці маім слова найпершае «мама»
I цяпер для мяне сама міла гучыць.
Так пісаў аб роднай мове знакаміты беларускі паэт Ніл Гілевіч. Мова родная, беларуская. Яна гучыць звонкім рэхам па зялёных лясах і бязмежных палях. Супрацоўнікі Свіслацкай гарпасялковай бібліятэкі ў рамках бібліятэчнай акцыі «Мова родная - мова бацькоў» для падлеткаў з гісторыка-патрыятычнага клуба «Зімародак» падрыхтавалі этнаграфічныя замалёўкі «Каласы роднай мовы». Сустрэча адбылася ў кутку роднай спадчыны. Удзельнікі сустрэчы не толькі чыталі, слухалі беларускую паэзію і адказвалі на пытанні літаратурна-фальклорнай віктарыны, але і з вялікай цікаўнасцю знаёміліся з экспанатамі бібліятэчнага музея, дзе мелі магчымасць апынуцца ў атмасферы старадаўніх рэчаў, зазірнуць у гісторыю быта беларусаў.
