Паэты – таленавітыя і незвычайныя людзі. Яны ўмеюць убачыць хараство душы чалавека, ствараць вобразныя малюнкі роднага краю. У сваёй творчасці паэты часта звяртаюцца да тэмы Радзімы, сцвярджаюць непарыўную повязь з роднай зямлёй. Пражыць без Радзімы немагчыма, яна – наш найвялікшы скарб. Гэтую думку падцвярджае паэт Алесь Бачыла, які нарадзіўся ў вёсцы Лешніца Пухавіцкага раёна 2 сакавіка 1918 года.
У Пухавіцкай раённай дзіцячай бібліятэцы адбылося паэтычнае знаёмства «Алесь Бачыла – пісьменнік-зямляк». Наведвальнікі літаратурнага гуртка «Нараджэнне слова» пазнаёміліся з біяграфіяй паэта. Яны даведаліся, што вёска Лешніца для пісьменніка была заўсёды самым маляўнічым і дарагім кутком, бо там прайшло яго маленства. Тут ён навучыўся любіць і шанаваць прыгожае слова. Гэта былі казкі, якія расказвала старэйшая сястра. Але пісаць вершы Алесь Бачыла пачаў толькі ў сталым ўзросте. З гэтымі вершамі і змаглі пазнаёміцца наведвальнікі літаратурнага гуртка, лістаючы зборнік паэта «Радзіма мая дарагая». А потым з вялікім задавальненнем дзеці чыталі вершы «Беларусь», «Цябе назвалі мы Радзімай» і «Дзятва на двары коціць снегавы ком…»
