7 ліпеня 2022 года спаўняецца 140 гадоў з дня нараджэння класiка беларускай лiтаратуры Янкi Купалы.
Янка Купала - Iван Дамiнiкавiч Луцэвiч. Свой псеўданiм выдатны пясняр выбраў невыпадкова: iм паэт хацеў падкрэслiць жаданне - i жыццём i песняй служыць свайму народу, дапамагчы яму знайсцi жаданую папараць-кветку, кветку шчасця. «Пiсаць аб народзе, па-народнаму i для народа» - такi дэвiз паэта на ўсiх этапах яго творчасцi. Янка Купала - непаўторны талент, у якiм увасабляецца сiла беларускага народа, прыгажосць яго духоўнага багацця, генiяльны паэт-прарок, аўтар папулярных вершаў: “Спадчына”, “Хлопчык i лётчык”, “Явар i калiна”, “Малiтва”; паэм: “Курган”, “Магiла льва”, “Яна і я” i iншых. Купалу мы ведаем i як драматурга - аўтара цудоўных п’ес – “Паўлiнка”, “Прымакi”, “Раскіданае гняздо”.
З нагоды юбілея класіка, у бібліятэках пухавіччыны пачаліся святочныя мерапрыемствы. У Сіслацкай гарпасялковай бібліятэцы прайшла літаратурна-гістарычная старонка "Нам засталася спадчына", прысвечаная 140-гогддзю з дня нараджэння Янкі Купалы. Мерапрыемства адбылося ў "Кутку роднай спадчыны", які знаходзіцца ў бібліятэцы. Удзельнікі сустрэчы чыталі вершы паэта, успаміналі жыццё і творчасць песняра беларускага народа.
