Як у свята купальскае, сонца,
Свой жывы абнаўляеш паглёд,
Аднаві славу нашай старонцы,
Аднаві яго сумны народ!
Янка Купала
У кожнага народа ёсць песняры, прарокі, якія сілай свайго паэтычнага таленту вызначаюць не толькі шляхі развіцця роднай мовы, літаратуры, культуры, але і фарміруюць нацыянальную самасвядомасць, увасабляюць нацыянальную ідэю, даючы мэту і сэнс існавання не аднаму пакаленню. Яны становяцца сімваламі свайго народа. Для беларусаў такім сімвалам з’яўляецца Янка Купала.
Паэт нарадзіўся ў фальварку Вязынка Мінскага павету Мінскай губерніі (зараз – Маладзечанскі раён Мінскай вобласці). Янка Купала – літаратурны псеўданім Івана Дамінікавіча Луцэвіча, які быў падказаны яму ўласнай датай нараджэння – 25 чэрвеня (7 ліпеня). Менавіта ў гэты дзень беларусы адзначаюць авеянае легендамі старажытнае свята Купалле.
Яркая творчасць беларускага паэта цікавіць не адно пакаленне. Свіслацкая гарпасялковая бібліятэка запрасіла сваіх юных чытачоў на паэтычную гадзіну "Думкі і згадкі пра Янку Купалу". Удзельнікі дакрануліся да старонак творчасці знакамітага песняра. Асаблівую ўвагу надалі тэме, дзе спалучаецца зямное і высокае, дзе Беларусь звязваецца з вышэйшай духоўнай сферай.
Увечары ўдзельнікі мерапрыемства далучыліся да гульнёва-фальклорнага свята "Купальскі карагод на гулянне кліча", якое праводзілася Свіслацкім Домам культуры сумесна з бібліятэкай.
