На працягу многіх гадоў Міхаіл Навіцкі з ААТ “Зазерка” адным з першых у раёне на адвозцы збожжа ад камбайнаў пераадольвае рубеж у дзве тысячы тон. Сёлета Міхаіл Васільевіч ужо перавёз 2625 тон збожжа.
Зазерскім хлебаробам засталося ўбраць лічаныя гектары збожжавых культур, але колькасць тон на рахунку вадзіцеля — лічба не канчатковая. З панядзелка Міхаіл Навіцкі задзейнічаны на перавозцы збожжа ў сельгасфіліяле “Светлая ніва”. На дапамогу калегам накіраваліся таксама камбайнеры ААТ “Зазерка” Іон Панфіл і Дзмітрый Клунко.
Міхаіл Навіцкі працуе ў гаспадарцы больш за 30 гадоў. На МАЗе, які калісьці атрымаў новым, праводзіць ужо чатырнаццатую ўборачную кампанію. За тэхнікай сочыць належным чынам, і яна адказвае вадзіцелю добрай працай.
— Першым маім рабочым аўтамабілем быў ГАЗ-53. У сельскую гаспадарку прыйшоў тады па прыкладзе бацькі, які працаваў брыгадзірам паляводчай брыгады, — гаворыць Міхаіл Васільевіч. — Мае поспехі — вынік зладжанай працы ўсёй каманды сельгасарганізацыі. Каб атрымаць добры ўраджай, на палетках шчыравалі дзясяткі чалавек.
Больш за дзве тысячы тон збожжа перавёз і яшчэ адзін вадзіцель ААТ “Зазерка” — Аляксандр Холад. На яго рахунку 2244 тоны збожжа.
Кацярына ВЕРНІКОЎСКАЯ.
